الخطوة دي أي مسوق ناجح هيقولك عليها: افهم عميلك قبل ما تعرض عليه حاجة.

دان لوين واحد من أكبر الأسماء في عالم التسويق بينصح دايمًا بإن لازم يكون عندك فهم عميق لجمهورك المستهدف.

مش كفاية إنك تعرف الفئة العمرية أو الجنس، لازم تفهم احتياجاتهم ورغباتهم، إيه اللي بيقلقهم، وإيه اللي بيحركهم لشراء منتج أو خدمة.

اسأل نفسك:

• هو خايف من إيه؟

• إيه اللي بيخليه يتردد؟

• ليه ممكن يشتري مني ومش من غيري؟

هنا بييجي دور Buyer Persona اللي اتكلمنا عنها قبل كده. المعلومات عن الBuyer Persona هتساعدك تبني حملات تسويقية موجهة بشكل دقيق وبتحقق نتائج ملموسة.

ابني الثقه بشكل صحيح

المحتوى هو الأساس اللي هيبني عليه العملاء ثقتهم في علامتك التجارية.

مش كفاية إنك تقدم محتوى تسويقي مباشر يطلب من العميل الشراء.

لازم تقدم قيمة قبل ما تطلب أي شيء.

رواد الأعمال بينصحوا إن المحتوى لازم يكون تعليمي، ممتع، وملهم. مثلاً، لو بتبيع منتج، استخدم المدونات، الفيديوهات، والإنفوجرافيكز علشان توضح للعميل إزاي منتجك هيحل مشكلته أو يحسن حياته.

الربط بين التسويق والمبيعات

ميتا وجوجل بيشددوا على إن واحد من أهم الحاجات اللي بتحقق مبيعات مستدامة هو الربط بين فريق التسويق وفريق المبيعات. التسويق بيمهد الطريق، لكن المبيعات هي اللي بتحقق النتيجة النهائية. لازم يكون فيه تعاون مستمر بين الفريقين علشان يحققوا أعلى عائد استثمار (ROI).

مبيعاتك مش هتزيد لو معندكش فريق مبيعات محترف ولو أقتصر علي بائع واحد، المهم انه يعرف يترجم اللي التسويق بيعمله لعملاء فعليين. دان لوين دايمًا بينصح بتدريب مستمر لفريق المبيعات على التعامل مع الاعتراضات وبناء الثقة مع العميل.

جزء كبير من المبيعات بيكون نفسي أكتر من إنه تكنيكي. روبرت هيث مؤلف كتب الاقناع، بيتكلم عن أهمية التأثير العاطفي في اتخاذ قرارات الشراء. فريق المبيعات لازم يعرف إزاي يستخدم العواطف لبناء علاقات قوية مع العملاء.

فالنهاية لو وقتك يسمح تقدر تباشر انت البيع لمنتجاتك او خدماتك، لكن دا هياخد منك وقت كبير ممكن فيه تنجز امور أهم تتطور البيزنس بتاعك.

المحتوى التفاعلي

المحتوى اللي بيشرك العميل هو مفتاح النجاح. مثلاً، جوجل بينصح باستخدام أدوات زي استطلاعات الرأي، الاختبارات، والفيديوهات التفاعلية اللي بتدي للعميل فرصة للتفاعل مع العلامة التجارية.

الإعلانات المدفوعة

الإعلانات المدفوعة على منصات زي فيسبوك وإنستجرام لازم تكون جزء أساسي من استراتيجيتك. ميتا بتوضح إن الإعلانات المستهدفة بشكل صحيح بتحقق نتائج ممتازة لو موجهة لجمهور مهتم بالفعل بالمنتج أو الخدمة. تقدر تستخدم بيانات التحليلات علشان تعرف مين اللي بيدخل على موقعك ومن إيه جايين، وده هيساعدك في تحسين حملاتك الإعلانية لتحقيق مبيعات أعلى.

القصص وخلق تجربة إنسانية

واحدة من أفضل الطرق لربط المحتوى التسويقي بزيادة المبيعات هي إنك تحكي قصص واقعية. الناس بتنجذب للقصص أكتر من البيانات الجافة. زي ما بيقول دان لوين، "القصة الجيدة بتبيع". حكي قصص عن نجاح عملاء سابقين، إزاي منتجك غير حياتهم، أو حتى قصص نجاح فريق العمل نفسه. الحاجات دي بتخلق رابط إنساني بين العميل والعلامة التجارية.

التوازن بين التسويق والمبيعات هو مفتاح زيادة المبيعات. محتوى تسويقي قوي لازم يخلق رغبة عند العميل، لكن فريق المبيعات هو اللي بيكمل الطريق للشراء. فلو مش بتهتم بتدريب فريق المبيعات بنفس القدر اللي بتصرفه على التسويق، مش هتحقق النتائج اللي بتتمنها.

ممكن تكون المشكلة في استراتيجيتك التسويقية. لو الرسالة التسويقية مش واضحة، أو الحملات بتاعتك مش متناسقة مع بعض، العميل مش هيقدر يفهم القيمة اللي بتقدمها. استراتيجية التسويق بتاعتك لازم تبقى مبنية على خطة واضحة، مش مجرد محاولات عشوائية.

بتنصح جوجل وميتا إن وجودك على السوشيال ميديا لازم يكون قوي ومتفاعل.

العملاء بيدوروا دايمًا على تقييمات وآراء ناس تانية قبل ما يشتروا، فلو مفيش حضور قوي ومصداقية، العملاء هيبقوا مترددين في اتخاذ القرار.

تقديم ضمانات واضحة

من ضمن النصائح اللي بيقدمها رواد الأعمال هو تقديم ضمانات واضحة زي استرجاع الأموال في حالة عدم الرضا، أو ضمان جودة المنتج. الحاجات دي بتدي للعميل شعور بالأمان وبالتالي بتشجعه ياخد خطوة الشراء.

هرم ماسلو بيتكلم عن الاحتياجات النفسية اللي بتحرك الناس للشراء. لو قدرت تقدم منتج أو خدمة بتخاطب احتياجات أساسية زي الأمان والانتماء، هيبقى عندك فرصة أكبر في تحقيق مبيعات مستمرة. لازم تفهم فين منتجك في هرم ماسلو، وإزاي تقدر تستخدم المفاهيم دي في حملاتك التسويقية علشان تخاطب احتياجات عميلك النفسية بشكل أعمق.